İnternet araşdırma kompaniyası Netcraft şəbəkədə mövcud olan saytların sayı ilə bağlı oktyabr ayına olan son məlumatları hazırlayıb. Qeyd edək ki, bu şirkət artıq 14 ildir ki, bu işlə məşğuldur. Məlumata görə 1 oktyabr 2008-ci il tarixində Qrinviç vaxtı ilə saat 00:00-da qlobal şəbəkədə 182 226 259 sayt işləyib. Bu saya, ayrılmış və ya ictimai servislərdə yaradılan bloqlar da daxil edilmişdir. Ötən ayla müqayisədə 948 min sayt artımı olub. Nəticələrdə ən populyar veb server isə Apache olub. Ay ərzində Apache-də çalışan daha 463 min sayt yaradılıb. Veb serverlər arasında Apache - 91,88 mln saytla (ümumi sayın 50,43%-i) liderdir, ikinci yerdə 62,77 mln (34,44%) saytla Microsoft IIS, üçüncü yerdə isə 10,49 mln (5,76%) saytla Google yerləşir.
İnformasiya təhlükəsizliyi üzrə İsveçrə mütəxəssisləri klaviaturanın düymələri ilə elektormaqnit siqnallarını analiz edən qurğu işləyiblər. Həmin qurğu ilə kompüter istifadəçisinin nə yazdığını müəyyən etmək olur. Siqnalların hesablanması üçün radioantena istifadə olunub. Noutbuk da daxil olmaqla bu üsulla 11 müxtəlif klaviatura testdən keçirilib.
Microsoft şirkəti 21 oktyabrı kiber-piratlarla mübarizə günü elan edib və 49 ölkədə müəllif hüquqlarının qorunmasına dair bir sıra layihəyə start verib.
Dünyanın texnologiya sahəsində məhşur istehsalçı firması Microsoft gələn il istifadəyə verilməsi planlaşdırılan Windows 7-dən əvvəl Vista SP2-ni təqdim etmək niyyətindədir. Qeyd edək ki, Windows 7-nin gələn ilin ikinci yarısında istifadəyə verilməsi nəzərdə tutulur. Firma rəsmiləri hal hazırda Windows server 2008 və Windows Vista üçün Service Pack 2 Betanı çıxarıldığını bəyan ediblər.
Alimlər belə qənaətə gəliblər ki, İnternetdə məlumat axtarışı yaşlı adamlara ağıl çevikliyini və yaddaşı qorumağa kömək edir. Los-Ancelesdə Kaliforniya Universitetinin tədqiqatçıları insanın İnternetdə axtarış edən zaman kəllə-beyin fəallığını yoxlayan maqnit-rezonans monitorinqi keçiriblər.